راجن پور :ٹریفک کے قونین کی پاسداری کے لیے آگاہی مہم

راجن پور میں عوامی سلامتی اور ٹریفک قوانین کی پاسداری کو یقینی بنانے کے لیے پنجاب پولیس اور پنجاب ہائی وے پیٹرول کی جانب سے ایک جامع آگاہی مہم کا انعقاد کیا گیا۔ انسپکٹر جنرل آف پنجاب پولیس اور ڈی آئی جی پنجاب ہائی وے پیٹرول اطہر وحید کے احکامات کی بروقت تعمیل کرتے ہوئے ڈسٹرکٹ آفیسر پنجاب ہائی وے پیٹرول راجن پور عبد المجید مستوئی کی زیرقیادت اور نگرانی میں یہ مہم قومی شاہراہ یعنی انڈس ہائی وے پر منعقد کی گئی۔ اس مہم کا بنیادی مقصد شاہراہوں پر ہونے والے حادثات میں کمی لانا اور عوام میں ٹریفک قوانین کے بارے میں شعور و آگاہی پیدا کرنا تھا۔

اس موقع پر ڈی ایس پی عبد المجید مستوئی نے براہ راست عوام سے خطاب کیا اور انہیں ٹریفک کے بنیادی قوانین اور احتیاطی تدابیر سے آگاہ کیا۔ انہوں نے واضح کیا کہ چھوٹی سی لاپروائی اور قانون سے انحراف نہ صرف اپنی بلکہ دوسروں کی جانوں کے لیے بھی خطرہ بن سکتا ہے۔ انہوں نے موٹر سائیکل سواروں کو ہدایت کی کہ وہ اپنی جان کے تحفظ کے لیے ہیلمٹ کا استعمال لازمی کریں، کیونکہ سر کی چوٹیں حادثات میں اموات کی ایک بڑی وجہ ہیں۔ بڑی گاڑیوں بشمول ٹرکوں، بسیں اور وینوں کے ڈرائیوروں کو ہدایات دی گئیں کہ وہ اپنی گاڑیوں پر فوگ لائٹس اور ریفلیکٹرز کا معیاری استعمال یقینی بنائیں تاکہ دھند اور کم روشنی میں گاڑیاں واضح نظر آ سکیں اور حادثات سے بچا جا سکے۔ انہوں نے ڈرائیوروں پر زور دیا کہ وہ سفر کے دوران سیٹ بیلٹ ضرور پہنیں اور ڈرائیونگ کرتے وقت موبائل فون استعمال کرنے سے سختی سے پرہیز کریں، کیونکہ یہ توجہ میں کمی کا باعث بنتا ہے اور حادثات کا خطرہ بڑھاتا ہے۔

ڈی ایس پی عبد المجید مستوئی نے مزید کہا کہ حادثات کی روک تھام محکمہ پولیس کی اکیلے کی کوششوں سے ممکن نہیں ہے۔ اس میں عوام کا فعال تعاون نہایت اہم ہے۔ انہوں نے شہریوں پر زور دیا کہ وہ نہ صرف خود ٹریفک قوانین پر عمل کریں بلکہ اپنے اردگرد موجود لوگوں کو بھی ان قوانین کی پاسداری کی تلقین کریں۔ انہوں نے یہ بھی واضح کیا کہ قانون کی خلاف ورزی کرنے والوں کے خلاف بلاامتیاز کارروائی کی جائے گی، تاکہ شاہراہوں پر نظم و ضبط قائم رہے۔

اس آگاہی مہم میں پنجاب ہائی وے پیٹرول کے دیگر افسران اور عملہ بھی موجود تھا، جنہوں نے شاہراہ پر گزرنے والے ڈرائیوروں اور مسافروں سے براہ راست بات چیت کی۔ انٹرچینج اور بس اسٹاپوں کے قریب عوام میں معلوماتی پمفلٹس بھی تقسیم کیے گئے۔ ان پمفلٹس میں ٹریفک کے اہم قوانین، حفاظتی تدابیر اور ہنگامی صورت حال میں متعلقہ حکام سے رابطے کے نمبرات درج تھے، تاکہ شہری انہیں سفر کے دوران بطور رہنما استعمال کر سکیں۔

یہ مہم محض ایک تقریب نہیں بلکہ مسلسل جاری رہنے والے سلسلے کا حصہ ہے، جس کا مقصد معاشرے کے ہر فرد تک حفاظت کا پیغام پہنچانا ہے۔ اداروں اور عوام کے باہمی تعاون سے ہی حادثات میں پائیدار کمی لائی جا سکتی ہے اور سفر کو محفوظ اور پرآسایش بنایا جا سکتا ہے۔